Search

Loading

Content

20 November 2012

ត្រកូល​ដែល​ប្រកប​ដោយ​អង្គ ៩​ ដែល​ភិក្ខុ​គួរ​ និង​មិន​គួរ​ចូល​ទៅ​រក

ត្រកូល​ប្រកប​ដោយ​អង្គ​ ៩ ដែល​ភិក្ខុ​មិន​គួរ​ចូល​ទៅ​រក

   ម្នាល​ភិក្ខុ​ទាំង​ឡាយ ត្រកូល​ប្រកប​ដោយ​អង្គ ៩ ដែល​ភិក្ខុ​មិន​ទាន់​ចូល​ទៅ ក៏​មិន​គួរ​ចូល​ទៅ បើ​ភិក្ខុ​ចូល​ជ្រុល​ទៅ​ហើយ​ ក៏​មិន​គួរ​អង្គុយ​ ។

   ត្រកូល​ប្រកប​ដោយ​អង្គ ៩ តើ​ដូច​ម្ដេច​ខ្លះ?

   គឺ

   ១. ន មនាបេន បច្ចុដ្ឋេន្តិ  គេ​មិន​ក្រោក​ទទួល ដោយ​សេចក្ដី​ពេញ​ចិត្ត

   ២. ន មនាបេន អភិវាទេន្តិ មិន​ថ្វាយ​បង្គំ ដោយ​សេចក្ដី​ពេញ​ចិត្ត

   ៣. ន មនាបេន អាសនំ ទេន្តិ មិន​ឱ្យ​អាសនៈ ដោយ​សេចក្ដី​ពេញ​ចិត្ត

   ៤. សន្តមស្ស បរិគុយ្ហន្តិ      លាក់​របស់​ដែល​មាន

   ៥. ពហុកម្បិ ថោកំ ទេន្តិ      របស់​មាន​ច្រើន​ឱ្យ​តិច

   ៦. បណីតម្បិ លូខំ ទេន្តិ      មាន​របស់​ដែល​ថ្លៃ​ថ្លា ឱ្យ​របស់​សៅ​ហ្មង

   ៧. អសក្កច្ចំ ទេន្តិ នោ សក្កច្ចំ ឱ្យ​ដោយ​មិនគោរព មិន​ឱ្យ​ ដោយ​គោរព

   ៨. ន ឧបនិសីទន្តិ ធម្មស្សវនាយ មិន​ចូល​ទៅ​អង្គុយ​ជិត ដើម្បី​ស្ដាប់​ធម៌​ដោយ​គោរព

   ៩. ភាសិតមស្ស ន រមិស្សន្តិ    មិន​ត្រេក​អរ​នឹង​ភាសិត​របស់​ភិក្ខុ​នោះ

   ម្នាល​ភិក្ខុ​ទាំង​ឡាយ ត្រកូល​ប្រកប​ដោយ​អង្គ​ ៩ នេះ​ឯង ដែល​ភិក្ខុ​មិន​ធ្លាប់​ចូល​ទៅ ក៏​មិន​គួរ​ចូល​ទៅ ឬ​ចូល​ជ្រុល​ទៅ​ហើយ ក៏​មិន​គួរ​អង្គុយ ។

ត្រកូល​ប្រកប​ដោយ​អង្គ ៩ ដែល​ភិក្ខុ​គួរ​ចូល​ទៅ​រក

   ម្នាល​ភិក្ខុ​ទាំង​ឡាយ ត្រកូល​ប្រកប​ដោយ​អង្គ​ ៩ ដែល​ភិក្ខុ​មិន​ទាន់​ចូល​ទៅ​ ក៏​គួរ​ចូល​ទៅ​បាន ឬ ចូល​ទៅ​ហើយ​ ក៏​គួរ​អង្គុយ​បាន ។

   ត្រកូល​ប្រកប​ដោយ​អង្គ ៩ តើ​ដូច​ម្ដេច​ខ្លះ?

   គឺ

   ១. មនាបេន បច្ចុដ្ឋេន្តិ   គេ​ក្រោក​ទទួល ដោយ​សេចក្ដី​ពេញ​ចិត្ត

   ២. មនាបេន អភិវាទេន្តិ ថ្វាយ​បង្គំ ដោយ​សេចក្ដី​ពេញ​ចិត្ត

   ៣. មនាបេន អាសនំ ទេន្តិ ឱ្យ​អាសនៈ ដោយ​សេចក្ដី​ពេញ​ចិត្ត

   ៤. សន្តមស្ស ន បរិគុយ្ហន្តិ មិន​លាក់​របស់​ដែល​មាន

   ៥. ពហុកម្បិ ពហុកំ ទេន្តិ  របស់​ដែល​មាន​ច្រើន​ឱ្យ​ច្រើន

   ៦. បណីតម្បិ បណីតំ ទេន្តិ របស់​ដែល​ថ្លៃ​ថ្លា ឱ្យ​របស់​ថ្លៃ​ថ្លា

   ៧. សក្កច្ចំ ទេន្តិ នោ អសក្កច្ចំ ឱ្យ​ដោយ​គោរព មិន​ឱ្យ​ ដោយ​មិន​គោរព

   ៨. ឧបនិសីទន្តិ ធម្មស្សវនាយ ចូល​ទៅ​អង្គុយ​ជិត ដើម្បី​ស្ដាប់​ធម៌

   ៩. ភាសិតមស្ស រមិស្សន្តិ       ត្រេក​អរ​នឹង​ភាសិត​របស់​ភិក្ខុ​នោះ

   ម្នាល​ភិក្ខុ​ទាំង​ឡាយ ត្រកូល​ប្រកប​ដោយ​អង្គ​ ៩ នេះ​ឯង ដែល​ភិក្ខុ​មិន​ទាន់​ចូល​ទៅ ក៏​គួរ​ចូល​ទៅ​បាន ឬ​ចូល​ទៅ​ហើយ ក៏​គួរ​អង្គុយ​បាន ។

( អង្គុត្តរនិកាយ នវកនិបាត កុលសូត្រ បិដក​លេខ ៤៩ ទំព័រ ៧០-៧១ )

អដ្ឋកថា​កុលសូត្រ​ទី ៧

   បទ​ថា ន មនាបេន បច្ចុបដ្ឋេន្តិ សេចក្ដី​ថា ក្រោក​ចាក​អាសនៈ​ហើយ រមែង​មិន​ធ្វើ​ការ​ទទួល​ដោយ​ការ​ចម្រើន​ចិត្ត គឺ​ដោយ​អាការ​ជាប់​ចិត្ត ។ បទ​ថា ន មនាបេន អភិវាទេន្តិ សេចក្ដី​ថា រមែង​មិន​ថ្វាយ​បង្គំ​ដោយ​​បញ្ចង្គប្រតិស្ឋាន ។ បទ​ថា អសក្កច្ចំ ទេន្តិ សេចក្ដី​ថា រមែង​ឱ្យ​ដោយ​សេចក្ដី​មិន​រាប់​អាន ។ បទ​ថា នោ សក្កច្ចំ សេចក្ដី​ថា រមែង​មិន​ឱ្យ​ដោយ​ដៃ​របស់​ខ្លួន ។ បទ​ថា ន ឧបនិសីទន្តិ ធម្មស្សវនាយ សេចក្ដី​ថា រមែង​មិន​អង្គុយ​ក្នុង​ទី​ជិត​ដោយ​គិត​ថា យើង​ទាំង​ឡាយ​នឹង​ស្ដាប់​ធម៌ ។ បទ​ថា ន រសិយន្តិ [ រមិស្សន្តិ ] សេចក្ដី​ថា រមែង​មិន​ត្រេក​អរ គឺ​រមែង​ទៅ​មិន​ត្រឡប់​ ដូច​ទឹក​ដែល​គេ​ចាក់​លើ​គូទ​ឆ្នាំងធំ ដូច្នោះ ៕

0 មតិ:

Post a Comment

សូម​ស្វាគមន៍​ការ​ចូល​មកកាន់​ទំព័រ​នេះ​ ។​
Contact me on Facebook Follow me on Twitter Subscribe to RSS Email me

Total Pageviews

អត្ថបទ​ចៃ​ដន្យ